Harrizko txalaparta, zurezko txalapartaren aldaera bat da, batzuek harriparta ere deitzen dutena. Hitz honek, txalaparta hitzari dagokion onomatopeiari zentzu guztia kentzen baitio, hobe deritzogu harrizko txalaparta edo harri txalaparta esatea.

Honako itxura du harrizko txalapartak: - Isolatzaile bat erabiliz (gomaespuma delakoa maizena), tamaina eta tankera desberdinetako hainbat harri jartzen dira (arbela gehienetan).
- Harriak ematen duten notaren arabera aukeratzen dira. Txalapartariek lau makil erabiltzen dituzte harria jotzeko, eta honela, agudo samarra den hots minerala sortzeko. Hotsa, erabilitako makilen tamainaren araberakoa da. Batzutan makilen muturrak larruz edo antzeko zerbaitez estaltzen dira honela harria kolpeetatik babesteko eta aldi berean azken honen hots dardara gehiago nabarmentzeko.